گلشن یہ مہک اٹھے گا تم آؤ کسی روز

گلشن یہ مہک اٹھے گا تم آؤ کسی روز

آ کر مرے پہلو کو بھی مہکاؤ کسی روز

کرتے ہو شب و روز تصور میں بسیرا

آنکھوں کے مری سامنے آ جاؤ کسی روز

تڑپاتے ہو ترساتے ہو مر جاؤں نہ غم سے

اب آب بقا بن کے چلے آؤ کسی روز

بادل بھی گریزاں ہے برسنے سے یہاں پر

بادل گھنی زلفوں کے لیے آؤ کسی روز

یہ دل جو دھڑکتا ہے دھڑکتا ہی رہے گا

آ کر مری دھڑکن کو بھی سمجھاؤ کسی روز

عادلؔ سے جو ملنے کی تمنا ہے تو اے دل

خوابوں سے نکل سامنے آ جاؤ کسی روز