gulsitan-dar-gulsitan ab baghban koi nahin

gulsitāñ-dar-gulsitāñ ab bāġhbāñ koī nahīñ

phuul sab tanhā khaḌe haiñ titliyāñ koī nahīñ

dhuup achchhī lag rahī hai aaj kitne din ke baad

bādaloñ kā duur tak nām-o-nishāñ koī nahīñ

ḳhushk lakḌī kī tarah se jal ga.e saare makāñ

ye ajab ki saarī bastī meñ dhuāñ koī nahīñ

naam kyā degā koī in be-sabab hālāt ko

mehrbāñ saare haiñ lekin mehrbāñ koī nahīñ

apne ghar se duur rah kar har qadam hai imtihāñ

kaun kahtā hai yahāñ par imtihāñ koī nahīñ

us ne apne shauq se dast-e-duā kaTvā diye

us ke chehre par likhī ab dāstāñ koī nahīñ

raat kī jhīloñ meñ utregī kahāñ se chāñdnī

ham siyāh-baḳhtoñ ko bhī aisā gumāñ koī nahīñ

kyā ḳhabar kyā ho gayā hai is muammar shaḳhs ko

din Dhale jañgal se chuntā lakḌiyāñ koī nahīñ

ik ajab sā hādsa dekhā hai 'safdar' shahr meñ

ḳhushk haiñ sab āshiyāñ aur bijliyāñ koī nahīñ

gulsitan-dar-gulsitan ab baghban koi nahin

phul sab tanha khaDe hain titliyan koi nahin

dhup achchhi lag rahi hai aaj kitne din ke baad

baadalon ka dur tak nam-o-nishan koi nahin

KHushk lakDi ki tarah se jal gae sare makan

ye ajab ki sari basti mein dhuan koi nahin

nam kya dega koi in be-sabab haalat ko

mehrban sare hain lekin mehrban koi nahin

apne ghar se dur rah kar har qadam hai imtihan

kaun kahta hai yahan par imtihan koi nahin

us ne apne shauq se dast-e-dua kaTwa diye

us ke chehre par likhi ab dastan koi nahin

raat ki jhilon mein utregi kahan se chandni

hum siyah-baKHton ko bhi aisa guman koi nahin

kya KHabar kya ho gaya hai is muammar shaKHs ko

din Dhale jangal se chunta lakDiyan koi nahin

ek ajab sa hadsa dekha hai 'safdar' shahr mein

KHushk hain sab aashiyan aur bijliyan koi nahin