gulsitan-e-zindagi mein zindagi paida karo

gulsitān-e-zindagī meñ zindagī paidā karo

muskurā kar ruuh meñ kuchh tāzgī paidā karo

murdanī chehre banā kar fā.eda jiine se kyā

kam se kam is zindagī meñ zindagī paidā karo

toḌ do baḌh kar añdherī raat ke shaḌyañtr ko

kuchh nahīñ to ārzū-e-raushnī paidā karo

vaqt ke be-rahm hāthoñ ne kuchal Daalā jinheñ

un ḳhizāñ-dīda guloñ meñ tāzgī paidā karo

dekh lenā ye jahāñ jannat-nishāñ ban jā.egā

dushmanoñ se rasm-o-rāh-e-zindagī paidā karo

sirf ābādī baḌhāne se koī hāsil nahīñ

jin meñ ho insāniyat vo aadmī paidā karo

ka.aba o kāshī alāmat haiñ ḳhudā ke nuur ke

tum ġharīboñ ke gharoñ meñ raushnī paidā karo

zindagī baḳhshī ga.ī hai dard-e-dil ke vāste

zindagī meñ dard-e-dil ai 'sāhnī' paidā karo

gulsitan-e-zindagi mein zindagi paida karo

muskura kar ruh mein kuchh tazgi paida karo

murdani chehre bana kar faeda jine se kya

kam se kam is zindagi mein zindagi paida karo

toD do baDh kar andheri raat ke shaDyantr ko

kuchh nahin to aarzu-e-raushni paida karo

waqt ke be-rahm hathon ne kuchal Dala jinhen

un KHizan-dida gulon mein tazgi paida karo

dekh lena ye jahan jannat-nishan ban jaega

dushmanon se rasm-o-rah-e-zindagi paida karo

sirf aabaadi baDhane se koi hasil nahin

jin mein ho insaniyat wo aadmi paida karo

kaba o kashi alamat hain KHuda ke nur ke

tum gharibon ke gharon mein raushni paida karo

zindagi baKHshi gai hai dard-e-dil ke waste

zindagi mein dard-e-dil ai 'sahni' paida karo