gulzar-e-jahan mein gul ki tarah go shad hain hum shadab hain hum

gulzār-e-jahāñ meñ gul kī tarah go shaad haiñ ham shādāb haiñ ham

kahtī hai ye hañs kar sub.h-e-ḳhizāñ sab nāz-e-abas ik ḳhvāb haiñ ham

kis māh-e-laqā ke ishq meñ yuuñ bechain haiñ ham betāb haiñ ham

kirnoñ kī tarah āvāra haiñ ham tāroñ kī tarah be-ḳhvāb haiñ ham

miT jaane pe bhī masrūr haiñ ham murjhāne pe bhī shādāb haiñ ham

shahbā-e-shabāb-o-ishq kā ik bhūlā huā rañgīñ ḳhvāb haiñ ham

fitrat ke jamāl-e-rañgīñ se ham ne bhī uThā.e haiñ parde

barbat hai agar firdaus-e-jahāñ to is ke liye mizrāb haiñ ham

ḳhush-vaqtī hai vaj.h-e-ranj-o-alam gulzār-e-jahāñ meñ ai hamdam

taa.ir na pukāreñ shaad haiñ ham ġhunche na kaheñ shādāb haiñ ham

milne pe gar aa.eñ koī makāñ ḳhālī nahīñ apne jalvoñ se

aur gosha-nashīñ ho jaa.eñ agar kamyāb nahīñ nāyāb haiñ ham

do din ke liye ham aa.e haiñ ik shab kī javānī laa.e haiñ

firdaus-e-sarā-e-hastī meñ ham rañg-e-gul-e-mahtāb haiñ ham

rusvā.ī-e-sher-o-ishq ne vo rutba hameñ 'aḳhtar' baḳhshā hai

faḳhr-e-dakan-o-bañgāl haiñ ham nāz-e-avadh-o-panjāb haiñ ham

gulzar-e-jahan mein gul ki tarah go shad hain hum shadab hain hum

kahti hai ye hans kar subh-e-KHizan sab naz-e-abas ek KHwab hain hum

kis mah-e-laqa ke ishq mein yun bechain hain hum betab hain hum

kirnon ki tarah aawara hain hum taron ki tarah be-KHwab hain hum

miT jaane pe bhi masrur hain hum murjhane pe bhi shadab hain hum

shahba-e-shabab-o-ishq ka ek bhula hua rangin KHwab hain hum

fitrat ke jamal-e-rangin se hum ne bhi uThae hain parde

barbat hai agar firdaus-e-jahan to is ke liye mizrab hain hum

KHush-waqti hai wajh-e-ranj-o-alam gulzar-e-jahan mein ai hamdam

tair na pukaren shad hain hum ghunche na kahen shadab hain hum

milne pe gar aaen koi makan KHali nahin apne jalwon se

aur gosha-nashin ho jaen agar kamyab nahin nayab hain hum

do din ke liye hum aae hain ek shab ki jawani lae hain

firdaus-e-sara-e-hasti mein hum rang-e-gul-e-mahtab hain hum

ruswai-e-sher-o-ishq ne wo rutba hamein 'aKHtar' baKHsha hai

faKHr-e-dakan-o-bangal hain hum naz-e-awadh-o-panjab hain hum