gulzar-e-mohabbat mein na phule na phale hum

gulzār-e-mohabbat meñ na phūle na phale ham

mānind-e-chinār aag meñ apnī hī jale ham

muddat pe jo kal us se mile ho ga.e be-ḳhud

samjhā na gayā ye ki mile kis ke gale ham

lohū kī tarah jam ga.e talvār ke muñh par

TukḌe hue par aage se us ke na Tale ham

āzurda 'abas hote ho tum nāla-kashī se

lo ḳhush raho ai ham-nafasāñ yaañ se chale ham

ai vā'da ġhalat to nahīñ aane kā phir andher

samjheñ haiñ tirā ḳhuub ye āre-o-bale ham

be-rahm kisī ne na ḳhabar lī tire dar par

juuñ naqsh-e-qadam dil hī ga.e paañv tale ham

mahfūz rakhā 'ishq ne īzā-e-ajal se

kunjashk the par changul-e-shāhīñ meñ pale ham

jab 'ishq kī ātish dil-e-afsurda meñ bhaḌkī

patthar the pe shīshe hī ke mānind gale ham

āñkho meñ ḳhalā.iq ke bure Thahre haiñ 'joshish'

is hasti-e-mauhūm meñ aa.e the bhale ham

gulzar-e-mohabbat mein na phule na phale hum

manind-e-chinar aag mein apni hi jale hum

muddat pe jo kal us se mile ho gae be-KHud

samjha na gaya ye ki mile kis ke gale hum

lohu ki tarah jam gae talwar ke munh par

TukDe hue par aage se us ke na Tale hum

aazurda 'abas hote ho tum nala-kashi se

lo KHush raho ai ham-nafasan yan se chale hum

ai wa'da ghalat to nahin aane ka phir andher

samjhen hain tera KHub ye aare-o-bale hum

be-rahm kisi ne na KHabar li tere dar par

jun naqsh-e-qadam dil hi gae panw tale hum

mahfuz rakha 'ishq ne iza-e-ajal se

kunjashk the par changul-e-shahin mein pale hum

jab 'ishq ki aatish dil-e-afsurda mein bhaDki

patthar the pe shishe hi ke manind gale hum

aankho mein KHalaiq ke bure Thahre hain 'joshish'

is hasti-e-mauhum mein aae the bhale hum