gulzar mein ek phul bhi KHandan to nahin hai

gulzār meñ ek phuul bhī ḳhandāñ to nahīñ hai

kuchh aur hai ye daur-e-bahārāñ to nahīñ hai

hai chāk-ba-dāmāñ hī tū ai lāla-e-ḳhud-sar

gul terī tarah dāġh-ba-dāmāñ to nahīñ hai

achchhā hī huā Duub gayā merā safīna

ab kashmakash-e-sāhil-o-tūfāñ to nahīñ hai

taqdīr kī baat aur hai varna dil-e-muztar

ummīd ke bar aane kā imkāñ to nahīñ hai

is bār-e-garāñ kā hai uThānā bahut āsāñ

ġham hai kisī kam-zarf kā ehsāñ to nahīñ hai

pāmāl kare kyuuñ koī be-dard ki sabza

begāna sahī nañg-e-gulistāñ to nahīñ hai

qīmat mire aañsū kī faqat ek tabassum

shabnam kī tarah ye koī arzāñ to nahīñ hai

kyuuñ mujh pe nazar hai tirī ai gardish-e-daurāñ

hastī mirī duniyā meñ numāyāñ to nahīñ hai

kuchh daaġh haiñ kuchh zaḳhm haiñ 'fāzil' ke jigar meñ

muflis hai magar be-sar-o-sāmāñ to nahīñ hai

gulzar mein ek phul bhi KHandan to nahin hai

kuchh aur hai ye daur-e-bahaaran to nahin hai

hai chaak-ba-daman hi tu ai lala-e-KHud-sar

gul teri tarah dagh-ba-daman to nahin hai

achchha hi hua Dub gaya mera safina

ab kashmakash-e-sahil-o-tufan to nahin hai

taqdir ki baat aur hai warna dil-e-muztar

ummid ke bar aane ka imkan to nahin hai

is bar-e-garan ka hai uThana bahut aasan

gham hai kisi kam-zarf ka ehsan to nahin hai

pamal kare kyun koi be-dard ki sabza

begana sahi nang-e-gulistan to nahin hai

qimat mere aansu ki faqat ek tabassum

shabnam ki tarah ye koi arzan to nahin hai

kyun mujh pe nazar hai teri ai gardish-e-dauran

hasti meri duniya mein numayan to nahin hai

kuchh dagh hain kuchh zaKHm hain 'fazil' ke jigar mein

muflis hai magar be-sar-o-saman to nahin hai