gum hun KHalaon mein ki sar-e-asman rahen

gum huuñ ḳhalāoñ meñ ki sar-e-āsmāñ raheñ

bichhḌe jo ham zamīñ se to jaane kahāñ raheñ

haa.il hazār raah meñ sang-e-girāñ raheñ

dariyā haiñ ham to kyoñ na musalsal ravāñ raheñ

ye chāhte hue bhī ki ban jaa.eñ aa.ina

āḳhir badan ke parde meñ kab tak nihāñ raheñ

ġhurbat ho ham pe sahl jo yādoñ ke ruup meñ

tum bhī hamāre saath raho ham jahāñ raheñ

jī chāhtā hai raunaq-e-bāzār dekh kar

is shahr hī meñ koī banā kar makāñ raheñ

qurbat 'ajab nahīñ ki diloñ ko nasīb ho

jismoñ ke fāsle na agar darmiyāñ raheñ

jab marhale varā-e-taḳhayyul haiñ aur bhī

ham kyoñ asīr-e-manzil-e-vahm-o-gumāñ raheñ

ham bhī haiñ phuul ham pe zamīn-e-chaman ke saath

fasloñ ke devtā bhī zarā mehrbāñ raheñ

'ḳhāvar' hamāre baa'd bahut hai ki chaar din

lauh-e-jahāñ pe sabt hamāre nishāñ raheñ

gum hun KHalaon mein ki sar-e-asman rahen

bichhDe jo hum zamin se to jaane kahan rahen

hail hazar rah mein sang-e-giran rahen

dariya hain hum to kyon na musalsal rawan rahen

ye chahte hue bhi ki ban jaen aaina

aaKHir badan ke parde mein kab tak nihan rahen

ghurbat ho hum pe sahl jo yaadon ke rup mein

tum bhi hamare sath raho hum jahan rahen

ji chahta hai raunaq-e-bazar dekh kar

is shahr hi mein koi bana kar makan rahen

qurbat 'ajab nahin ki dilon ko nasib ho

jismon ke fasle na agar darmiyan rahen

jab marhale wara-e-taKHayyul hain aur bhi

hum kyon asir-e-manzil-e-wahm-o-guman rahen

hum bhi hain phul hum pe zamin-e-chaman ke sath

faslon ke dewta bhi zara mehrban rahen

'KHawar' hamare ba'd bahut hai ki chaar din

lauh-e-jahan pe sabt hamare nishan rahen