گم ہوں خلاؤں میں کہ سر آسماں رہیں

گم ہوں خلاؤں میں کہ سر آسماں رہیں

بچھڑے جو ہم زمیں سے تو جانے کہاں رہیں

حائل ہزار راہ میں سنگ گراں رہیں

دریا ہیں ہم تو کیوں نہ مسلسل رواں رہیں

یہ چاہتے ہوئے بھی کہ بن جائیں آئنہ

آخر بدن کے پردے میں کب تک نہاں رہیں

غربت ہو ہم پہ سہل جو یادوں کے روپ میں

تم بھی ہمارے ساتھ رہو ہم جہاں رہیں

جی چاہتا ہے رونق بازار دیکھ کر

اس شہر ہی میں کوئی بنا کر مکاں رہیں

قربت عجب نہیں کہ دلوں کو نصیب ہو

جسموں کے فاصلے نہ اگر درمیاں رہیں

جب مرحلے ورائے تخیل ہیں اور بھی

ہم کیوں اسیر منزل وہم و گماں رہیں

ہم بھی ہیں پھول ہم پہ زمین چمن کے ساتھ

فصلوں کے دیوتا بھی ذرا مہرباں رہیں

خاورؔ ہمارے بعد بہت ہے کہ چار دن

لوح جہاں پہ ثبت ہمارے نشاں رہیں