gum kar diya hai did ne yun sar-ba-sar mujhe

gum kar diyā hai diid ne yuuñ sar-ba-sar mujhe

miltī hai ab unhīñ se kuchh apnī ḳhabar mujhe

nāloñ se maiñ ne aag lagā dī jahān meñ

sayyād jāntā thā faqat musht-e-par mujhe

allāh re un ke jalve kī hairat-fazā.iyāñ

ye haal hai ki kuchh nahīñ aatā nazar mujhe

maanā harīm-e-nāz kā paaya buland hai

le jā.egā uchhāl ke dard-e-jigar mujhe

aisā ki but-kade kā jise raaz ho supurd

ahl-e-haram meñ koī na aayā nazar mujhe

kyā dard-e-hijr aur ye kyā lazzat-e-visāl

is se bhī kuchh buland milī hai nazar mujhe

mast-e-shabāb vo haiñ maiñ sarshār-e-ishq huuñ

merī ḳhabar unheñ hai na un kī ḳhabar mujhe

jab asl is majāz o haqīqat kī ek hai

phir kyuuñ phirā rahe haiñ idhar se udhar mujhe

gum kar diya hai did ne yun sar-ba-sar mujhe

milti hai ab unhin se kuchh apni KHabar mujhe

nalon se main ne aag laga di jahan mein

sayyaad jaanta tha faqat musht-e-par mujhe

allah re un ke jalwe ki hairat-fazaiyan

ye haal hai ki kuchh nahin aata nazar mujhe

mana harim-e-naz ka paya buland hai

le jaega uchhaal ke dard-e-jigar mujhe

aisa ki but-kade ka jise raaz ho supurd

ahl-e-haram mein koi na aaya nazar mujhe

kya dard-e-hijr aur ye kya lazzat-e-visal

is se bhi kuchh buland mili hai nazar mujhe

mast-e-shabab wo hain main sarshaar-e-ishq hun

meri KHabar unhen hai na un ki KHabar mujhe

jab asl is majaz o haqiqat ki ek hai

phir kyun phira rahe hain idhar se udhar mujhe