gum-karda-rah KHak-basar hun zara Thahar

gum-karda-rāh ḳhāk-basar huuñ zarā Thahar

ai tez-rau ġhubār-e-safar huuñ zarā Thahar

raqs-e-numūd yak do nafas aur bhī sahī

dosh-e-havā pe misl-e-sharar huuñ zarā Thahar

apnā ḳhirām tez na kar ai nasīm-e-zīst

bujhne ko huuñ charāġh-e-sahar huuñ zarā Thahar

vo din qarīb hai ki meñ āñkhoñ ko muuñd luuñ

yaanī halāk-e-zauq-e-nazar huuñ zarā Thahar

ai dost merī talḳh-navā.ī pe tū na jā

shīrīñ misāl-e-ḳhvāb-e-sahar huuñ zarā Thahar

jis raah se uThā huuñ vahīñ baiTh jā.ūñgā

maiñ kārvāñ kī gard-e-safar huuñ zarā Thahar

ai shahsavār-e-husn mujhe rauñd kar na jā

vāmāñda misl-e-rāhguzar huuñ zarā Thahar

ai āftāb-e-husn mirī kyā bisāt hai

daryūza-gar huuñ nūr-e-qamar huuñ zarā Thahar

mauhūm sī umiid huuñ mujh se gurez kyā

apnī kisī duā kā asar huuñ zarā Thahar

gum-karda-rah KHak-basar hun zara Thahar

ai tez-rau ghubar-e-safar hun zara Thahar

raqs-e-numud yak do nafas aur bhi sahi

dosh-e-hawa pe misl-e-sharar hun zara Thahar

apna KHiram tez na kar ai nasim-e-zist

bujhne ko hun charagh-e-sahar hun zara Thahar

wo din qarib hai ki mein aankhon ko mund lun

yani halak-e-zauq-e-nazar hun zara Thahar

ai dost meri talKH-nawai pe tu na ja

shirin misal-e-KHwab-e-sahar hun zara Thahar

jis rah se uTha hun wahin baiTh jaunga

main karwan ki gard-e-safar hun zara Thahar

ai shahsawar-e-husn mujhe raund kar na ja

wamanda misl-e-rahguzar hun zara Thahar

ai aaftab-e-husn meri kya bisat hai

daryuza-gar hun nur-e-qamar hun zara Thahar

mauhum si umid hun mujh se gurez kya

apni kisi dua ka asar hun zara Thahar