گم صم گم صم لگتے نہیں تم ہم کو اچھے اللہ میاں

گم صم گم صم لگتے نہیں تم ہم کو اچھے اللہ میاں

بولو بولو کچھ تو بولو پھول سے پیارے اللہ میاں

رات ملے چندا ماما سے اور پریوں کے دیس گئے

اڑن کھٹولے میں دیکھے تھے بغل میں بیٹھے اللہ میاں

اس دن جب بارش میں ہماری ناؤ ڈوبی پانی میں

صحن میں بیٹھے ساتھ ہمارے روئے جیسے اللہ میاں

دودھ جلیبی کیوں نہیں لاتے کہاں ہے مٹی کا ہاتھی

ہم نہیں بولتے ہم نہیں بولتے کالے کلوٹے اللہ میاں

کہاں اندھیرے میں جاتے ہو باہر بھوت آ جائے گا

دیکھو چپکے سے سو جاؤ ساتھ ہمارے اللہ میاں