gum unhin main hun un ka dhyan kab nahin aata

gum unhīñ maiñ huuñ un kā dhyān kab nahīñ aatā

yaad unheñ bhulāne kā koī Dhab nahīñ aatā

zabt-e-girya kī talqīñ ḳhatm kar bas ai hamdam

baat baat par ronā be-sabab nahīñ aatā

kis pe jaan detā huuñ raaz hī meñ rahne de

naam us dil-ārā kā tā-ba-lab nahīñ aatā

kyā kahūñ use pahle dekhtā thā kis Dhab se

jo hasīñ nazar mujh ko aah ab nahīñ aatā

jitne bāda-ḳhvār aa.e tālib-e-nashāt aa.e

sāqiyā koī mujh sā haq talab nahīñ aatā

itne ġhamgusāroñ se shaad kyā ho vo ġhamgīñ

ġham bhī jis ke hisse meñ sab kā sab nahīñ aatā

terī kam-nigāhī kā talab khīñch laatā hai

sāmne tire maiñ ḳhud be-sabab nahīñ aatā

rashk-e-ġhair ai 'manzūr' aise vaqt aatā hai

dost ke tasavvur meñ dost jab nahīñ aatā

gum unhin main hun un ka dhyan kab nahin aata

yaad unhen bhulane ka koi Dhab nahin aata

zabt-e-girya ki talqin KHatm kar bas ai hamdam

baat baat par rona be-sabab nahin aata

kis pe jaan deta hun raaz hi mein rahne de

nam us dil-ara ka ta-ba-lab nahin aata

kya kahun use pahle dekhta tha kis Dhab se

jo hasin nazar mujh ko aah ab nahin aata

jitne baada-KHwar aae talib-e-nashat aae

saqiya koi mujh sa haq talab nahin aata

itne ghamgusaron se shad kya ho wo ghamgin

gham bhi jis ke hisse mein sab ka sab nahin aata

teri kam-nigahi ka talab khinch lata hai

samne tere main KHud be-sabab nahin aata

rashk-e-ghair ai 'manzur' aise waqt aata hai

dost ke tasawwur mein dost jab nahin aata