guman ke liye nahin yaqin ke liye nahin

gumān ke liye nahīñ yaqīn ke liye nahīñ

ajiib rizq-e-ḳhvāb hai zamīn ke liye nahīñ

ḳhayāl jo qadam-kushā hai tere lā-shu.ūr meñ

ġhazāl hai magar sabuktagīn ke liye nahīñ

havā.eñ gosh-bar-sadā haiñ kis ke baab meñ ḳhamosh

nahīñ diye kī āya-e-mubīn ke liye nahīñ

use chhupāo kushtagāñ ke dil meñ raaz kī tarah

ye teġh-e-ābdār āstīn ke liye nahīñ

maiñ ek būḌhe falsafī ke ḳhvāb kā amiin huuñ

mire laboñ kī sāḳht añgbīn ke liye nahīñ

kamand ko kamān ko abhī se tah na kījiye

ki ye shikār ke liye haiñ ziin ke liye nahīñ

jo tiir uḌ chalā hai vo mire liye hai 'shahryār'

yasār ke liye nahīñ yamīn ke liye nahīñ

guman ke liye nahin yaqin ke liye nahin

ajib rizq-e-KHwab hai zamin ke liye nahin

KHayal jo qadam-kusha hai tere la-shuur mein

ghazal hai magar sabuktagin ke liye nahin

hawaen gosh-bar-sada hain kis ke bab mein KHamosh

nahin diye ki aaya-e-mubin ke liye nahin

use chhupao kushtagan ke dil mein raaz ki tarah

ye tegh-e-abdar aastin ke liye nahin

main ek buDhe falsafi ke KHwab ka amin hun

mere labon ki saKHt angbin ke liye nahin

kamand ko kaman ko abhi se tah na kijiye

ki ye shikar ke liye hain zin ke liye nahin

jo tir uD chala hai wo mere liye hai 'shahryar'

yasar ke liye nahin yamin ke liye nahin