guman ki had se guzar kar yaqin ki had mein aae

gumāñ kī had se guzar kar yaqīñ kī had meñ aa.e

vo āsmān agar hai zamīñ kī had meñ aa.e

makīñ to rahte haiñ har dam makān kī had meñ

kabhī makāñ bhī to apne makīñ kī had meñ aa.e

tamām umr use DhūñDhtī rahīñ āñkheñ

vo aa sake to dam-e-vāpsīñ kī had meñ aa.e

use milegā surāġh-e-adam surāġh-e-vajūd

jo haañ kī had se nikal kar nahīñ kī had meñ aa.e

ye kaise saañp haiñ jo duudh jā-ba-jā pī kar

panāh lene mirī āstīñ kī had meñ aa.e

tamām log hue razm-o-bazm kā hissa

magar 'zafar' kisī gosha-nashīñ kī had meñ aa.e

guman ki had se guzar kar yaqin ki had mein aae

wo aasman agar hai zamin ki had mein aae

makin to rahte hain har dam makan ki had mein

kabhi makan bhi to apne makin ki had mein aae

tamam umr use DhunDhti rahin aankhen

wo aa sake to dam-e-wapsin ki had mein aae

use milega suragh-e-adam suragh-e-wajud

jo han ki had se nikal kar nahin ki had mein aae

ye kaise sanp hain jo dudh ja-ba-ja pi kar

panah lene meri aastin ki had mein aae

tamam log hue razm-o-bazm ka hissa

magar 'zafar' kisi gosha-nashin ki had mein aae