guman ki mad mein yaqini KHasara karta hun

gumāñ kī mad meñ yaqīnī ḳhasāra kartā huuñ

nahīñ hai koī to kis ko pukārā kartā huuñ

ye zindagī ki mujhe nā-murād kartī hai

vo khel hai ki musalsal maiñ haarā kartā huuñ

nihāñ hai lamha-e-maujūd meñ ḳhudā sā koī

maiñ guzre vaqt pe lekin guzārā kartā huuñ

'ajīb bhed hai khul kar bhī kuchh nahīñ khultā

so āsmāñ ko tirā isti'āra kartā huuñ

vo mauj-e-sabz kuchh is tarh chhū ke guzrī thī

maiñ apne aap se ab tak kināra kartā huuñ

guman ki mad mein yaqini KHasara karta hun

nahin hai koi to kis ko pukara karta hun

ye zindagi ki mujhe na-murad karti hai

wo khel hai ki musalsal main haara karta hun

nihan hai lamha-e-maujud mein KHuda sa koi

main guzre waqt pe lekin guzara karta hun

'ajib bhed hai khul kar bhi kuchh nahin khulta

so aasman ko tera isti'ara karta hun

wo mauj-e-sabz kuchh is tarh chhu ke guzri thi

main apne aap se ab tak kinara karta hun