gumrah ho gaya rah-e-hamwar dekh kar

gumrāh ho gayā rah-e-hamvār dekh kar

chalnā thā dil ko jāda-e-dushvār dekh kar

jo sar jhukā thā sañg-e-dar-e-yār dekh kar

ūñchā huā hai phir rasan-o-dār dekh kar

shorīdgi-e-sar ko na thā koī mashġhala

dil ḳhush huā hai raah meñ dīvār dekh kar

kyā maiñ kahūñ ki haath se kyuuñ jaam gir paḌā

sarshār ho gayā tujhe sarshār dekh kar

garche ye daur lafzoñ kī bāzīgarī kā hai

kartā hai vaqt faisla kirdār dekh kar

tūfān-e-tīrgī thā bahut dahshat-āfrīñ

himmat baḌhī hai sham-e-ruḳh-e-yār dekh kar

dil aur dimāġh donoñ mere ham-safar haiñ aaj

hairat na kījiye merī raftār dekh kar

'shiblī' samand-e-shauq ko mahmez ik lagī

'ġhālib' kī is zamīn ko gul-kār dekh kar

gumrah ho gaya rah-e-hamwar dekh kar

chalna tha dil ko jada-e-dushwar dekh kar

jo sar jhuka tha sang-e-dar-e-yar dekh kar

uncha hua hai phir rasan-o-dar dekh kar

shoridgi-e-sar ko na tha koi mashghala

dil KHush hua hai rah mein diwar dekh kar

kya main kahun ki hath se kyun jam gir paDa

sarshaar ho gaya tujhe sarshaar dekh kar

garche ye daur lafzon ki bazigari ka hai

karta hai waqt faisla kirdar dekh kar

tufan-e-tirgi tha bahut dahshat-afrin

himmat baDhi hai sham-e-ruKH-e-yar dekh kar

dil aur dimagh donon mere ham-safar hain aaj

hairat na kijiye meri raftar dekh kar

'shibli' samand-e-shauq ko mahmez ek lagi

'ghaalib' ki is zamin ko gul-kar dekh kar