گمرہی سے یوں کمال آگہی تک آ گئے

گمرہی سے یوں کمال آگہی تک آ گئے

ہم بہت بھٹکے مگر تیری گلی تک آ گئے

ان چراغوں کو بتا دو نیند سے جاگیں ذرا

بڑھتے بڑھتے اب اندھیرے روشنی تک آ گئے

زور سے ہنسنے لگے پھر عمر کے سب ماہ و سال

ہم نے یہ پوچھا تھا کیا ہم زندگی تک آ گئے

جو کہا میں نے وہاں تک کوئی بھی پہنچا نہیں

ان سنی کرتے ہوئے سب ان کہی تک آ گئے

زندگی کے ہر قدم پر اک نیا بکھراؤ ہے

ہم بڑی ترتیب سے بے رہ روی تک آ گئے

اک نئے مفہوم سے تحریر کرنا ہے انہیں

بہتے بہتے اب مرے آنسو خوشی تک آ گئے

ہر عمل کا لازمی ہوتا ہے اک رد عمل

اب فریب اس کے مری سادہ دلی تک آ گئے

ختم ہوتی ہی نہیں خالدؔ اجالوں کی تلاش

دھوپ سے ہوتے ہوئے ہم چاندنی تک آ گئے