غنچۂ شوق مسکرایا ہے

غنچۂ شوق مسکرایا ہے

آج کس کا خیال آیا ہے

میرا حسن یقیں معاذ اللہ

میں نے بت کو خدا بنایا ہے

اک تبسم حیات غنچہ سہی

اک تبسم بھی کس نے پایا ہے

ہائے وہ کیف انتظار جسے

تیری یادوں نے گدگدایا ہے

جس کو ابر بہار کہتے ہیں

وہ ترے گیسوؤں کا سایا ہے

تیرے قربان دورئ منزل

تو نے ذوق سفر بڑھایا ہے

اس کا مقروض ہے خدائے کریم

جس نے مفلس پہ رحم کھایا ہے

وقت کی تیز گامیاں توبہ

ہم سے آگے ہمارا سایا ہے

صبح دم دیکھ کر گلوں کو بہارؔ

دیر تک کوئی یاد آیا ہے