ghuncha-e-shauq muskuraya hai

ġhuncha-e-shauq muskurāyā hai

aaj kis kā ḳhayāl aaya hai

merā husn-e-yaqīñ ma.āz-allāh

maiñ ne but ko ḳhudā banāyā hai

ik tabassum hayāt-e-ġhuncha sahī

ik tabassum bhī kis ne paayā hai

haa.e vo kaif-e-intizār jise

terī yādoñ ne gudgudāyā hai

jis ko abr-e-bahār kahte haiñ

vo tire gesuoñ kā saayā hai

tere qurbān dūrī-e-manzil

tū ne zauq-e-safar baḌhāyā hai

us kā maqrūz hai ḳhudā-e-karīm

jis ne muflis pe rahm khāyā hai

vaqt kī tez-gāmiyāñ tauba

ham se aage hamārā saayā hai

sub.h-dam dekh kar guloñ ko 'bahār'

der tak koī yaad aaya hai

ghuncha-e-shauq muskuraya hai

aaj kis ka KHayal aaya hai

mera husn-e-yaqin maaz-allah

main ne but ko KHuda banaya hai

ek tabassum hayat-e-ghuncha sahi

ek tabassum bhi kis ne paya hai

hae wo kaif-e-intizar jise

teri yaadon ne gudgudaya hai

jis ko abr-e-bahaar kahte hain

wo tere gesuon ka saya hai

tere qurban duri-e-manzil

tu ne zauq-e-safar baDhaya hai

us ka maqruz hai KHuda-e-karim

jis ne muflis pe rahm khaya hai

waqt ki tez-gamiyan tauba

hum se aage hamara saya hai

subh-dam dekh kar gulon ko 'bahaar'

der tak koi yaad aaya hai