ghuncha ghuncha mausam-e-rang-e-ada mein qaid tha

ġhuncha ġhuncha mausam-e-rañg-e-adā meñ qaid thā

dil vo nādāñ thā ki apnī hī anā meñ qaid thā

aañkh kī momī galī pyāsī thī pyāsī hī rahī

shabnamī bādal zamāne kī havā meñ qaid thā

be-ruḳhī kī ghar kī dīvāroñ pe thī chūnā-kalī

zarra zarra ajnabiyyat kī fazā meñ qaid thā

āsmāñ ke taaq par sajte rahe ik ik charāġh

maiñ zamīñ kā chāñd apne hī ḳhalā meñ qaid thā

raat ke ifrīt ne shab-ḳhūn maarā be-tarah

kārvān-e-sub.h zanjīr-e-duā meñ qaid thā

kaun thā vo jis ne apne ḳhuun se likkhā thā ḳhat

kis ke dil kā rañg is barg-e-hinā meñ qaid thā

aañkh ke āñgan se ḳhvāboñ kā parinda uḌ gayā

raat bhar 'shāhīn' yādoñ kī chitā meñ qaid thā

ghuncha ghuncha mausam-e-rang-e-ada mein qaid tha

dil wo nadan tha ki apni hi ana mein qaid tha

aankh ki momi gali pyasi thi pyasi hi rahi

shabnami baadal zamane ki hawa mein qaid tha

be-ruKHi ki ghar ki diwaron pe thi chuna-kali

zarra zarra ajnabiyyat ki faza mein qaid tha

aasman ke taq par sajte rahe ek ek charagh

main zamin ka chand apne hi KHala mein qaid tha

raat ke ifrit ne shab-KHun mara be-tarah

karwan-e-subh zanjir-e-dua mein qaid tha

kaun tha wo jis ne apne KHun se likkha tha KHat

kis ke dil ka rang is barg-e-hina mein qaid tha

aankh ke aangan se KHwabon ka parinda uD gaya

raat bhar 'shahin' yaadon ki chita mein qaid tha