ghunche ne taj gul ne kiya pairahan durust

ġhunche ne taaj gul ne kiyā pairahan durust

shādī bahār kī hai huā hai chaman durust

paiġhām-e-rustḳhez hai aamad bahār kī

mar kar huī hai nargis-e-bīmār tandurust

rakkhā dahān-e-tañg ne matlab ko nā-tamām

niklā tumhāre muñh se na koī suḳhan durust

gul jalva-gar haiñ āmad-e-fasl-e-bahār hai

kar bāġhbāñ nasheb-o-farāz-e-chaman durust

paivand-e-mehr-o-māh lagātā hai roz-o-shab

kartā hai charḳh-e-pīr ridā-e-kuhan durust

dast-e-junūñ ne qaid-e-ta.alluq se dī najāt

pahuñchā na ek ta-ba-gulū pairahan durust

kartī hai jam' bād-e-sabā ḳhaak muntashir

hotā hai phir nishān-e-mazār-e-kuhan durust

hotī haiñ josh-e-ishq meñ jo jo shikāyateñ

kahtā hai naaz se vo but-e-sīm-tan durust

farhād ne fareb-e-mohabbat meñ jaan dī

samjhā ki hai muāmala-e-pīr-zan durust

saaqī bhalā ho ḳhair subū koī jaam de

rakkhe ḳhudā hamesha tirī anjuman durust

nāhaq ḳharāsh zaḳhm kī detā hai zīnateñ

kartā hai shāna zulf-e-but-e-sīm-tan durust

kis rashk-e-gul kī shohrat-e-nazzārgī hai aaj

karte haiñ ġhuncha-hā-e-chaman pairahan durust

zañg-e-duī se ā.ina-e-dil hai pāk-o-sāf

rahtā hai apnā gosha-e-bait-ul-huzn durust

be-fā.eda haiñ chāragaroñ kī mashaqqateñ

hote nahīñ haiñ 'ishq ke bīmār-tan durust

chāTā hai ek 'umr luāb-e-zabān-e-teġh

zaḳhmoñ ke muddatoñ meñ hue haiñ dahan durust

badlūñ radīf aur ki jī bhar gayā 'nasīm'

ho aur tarah zulf-e-urūs-e-suḳhan durust

ghunche ne taj gul ne kiya pairahan durust

shadi bahaar ki hai hua hai chaman durust

paigham-e-rustKHez hai aamad bahaar ki

mar kar hui hai nargis-e-bimar tandurust

rakkha dahan-e-tang ne matlab ko na-tamam

nikla tumhaare munh se na koi suKHan durust

gul jalwa-gar hain aamad-e-fasl-e-bahaar hai

kar baghban nasheb-o-faraaz-e-chaman durust

paiwand-e-mehr-o-mah lagata hai roz-o-shab

karta hai charKH-e-pir rida-e-kuhan durust

dast-e-junun ne qaid-e-talluq se di najat

pahuncha na ek ta-ba-gulu pairahan durust

karti hai jam' baad-e-saba KHak muntashir

hota hai phir nishan-e-mazar-e-kuhan durust

hoti hain josh-e-ishq mein jo jo shikayaten

kahta hai naz se wo but-e-sim-tan durust

farhad ne fareb-e-mohabbat mein jaan di

samjha ki hai muamala-e-pir-zan durust

saqi bhala ho KHair subu koi jam de

rakkhe KHuda hamesha teri anjuman durust

nahaq KHarash zaKHm ki deta hai zinaten

karta hai shana zulf-e-but-e-sim-tan durust

kis rashk-e-gul ki shohrat-e-nazzargi hai aaj

karte hain ghuncha-ha-e-chaman pairahan durust

zang-e-dui se aaina-e-dil hai pak-o-saf

rahta hai apna gosha-e-bait-ul-huzn durust

be-faeda hain chaaragaron ki mashaqqaten

hote nahin hain 'ishq ke bimar-tan durust

chaTa hai ek 'umr luab-e-zaban-e-tegh

zaKHmon ke muddaton mein hue hain dahan durust

badlun radif aur ki ji bhar gaya 'nasim'

ho aur tarah zulf-e-urus-e-suKHan durust