ghunche wahi hain gul wahi gulzar bhi wahi

ġhunche vahī haiñ gul vahī gulzār bhī vahī

dast-e-junūñ sañbhalnā ki haiñ ḳhaar bhī vahī

haiñ intizār-e-sang meñ asmār be-shumār

aur inkisār se jhuke ashjār bhī vahī

ḳhush ho ke jhuum letī hai aksar to zindagī

lekin vufūr-e-ġham se hai bezār bhī vahī

hai shahryār jis ko na ho zar kī ehtiyāj

ahl-e-duval ke shahr meñ muḳhtār bhī vahī

mar mar ke jī rahā huuñ tire bod-o-qurb meñ

inkār bhī vahī tirā iqrār bhī vahī

kartā hai vo nasā.eh sadā amn kī magar

saare jahāñ se barsar-e-paikār bhī vahī

kyā hai 'shakīl' duniyā ki us kī nigāh meñ

jo sab ke kaam aatā hai be-kār bhī vahī

ghunche wahi hain gul wahi gulzar bhi wahi

dast-e-junun sanbhalna ki hain KHar bhi wahi

hain intizar-e-sang mein asmar be-shumar

aur inkisar se jhuke ashjar bhi wahi

KHush ho ke jhum leti hai aksar to zindagi

lekin wufur-e-gham se hai bezar bhi wahi

hai shahryar jis ko na ho zar ki ehtiyaj

ahl-e-duwal ke shahr mein muKHtar bhi wahi

mar mar ke ji raha hun tere bod-o-qurb mein

inkar bhi wahi tera iqrar bhi wahi

karta hai wo nasaeh sada amn ki magar

sare jahan se barsar-e-paikar bhi wahi

kya hai 'shakil' duniya ki us ki nigah mein

jo sab ke kaam aata hai be-kar bhi wahi