غنچوں نے دہن کھولے کلیوں نے لی انگڑائی

غنچوں نے دہن کھولے کلیوں نے لی انگڑائی

یوں صحن گلستاں میں چپکے سے بہار آئی

دنیا اسے کہتی ہے پھر کس لیے سودائی

جو خود ہی ہو دیوانہ اور خود ہی تماشائی

کیوں کر نہ کروں اے دل اس غم کی پذیرائی

غربت میں یہی تو ہے اک مونس تنہائی

کہتے نہ تھے اک دن وہ مائل بہ کرم ہوں گے

یہ ضبط کی عادت ہی آخر مرے کام آئی

ہر گام رکاوٹ ہے حائل رہ منزل میں

ہوتی ہے مسافر کی یوں حوصلہ افزائی

کیوں کر نہ زمانے کی آنکھوں سے چھپاؤں میں

ہر چیز سے پیاری ہے مجھ کو مری تنہائی

حسرتؔ رہ الفت میں آخر وہ مقام آیا

لینے کے لئے مجھ کو منزل مرے پاس آئی