ghurbat ka ab mazaq uDane lage hain log

ġhurbat kā ab mazāq uḌāne lage haiñ log

daulat ko sar kā taaj batāne lage haiñ log

tahzīb-e-shahr kitnī badal dī hai vaqt ne

apnī rivāyatoñ ko bhulāne lage haiñ log

allāh un kī aql kā pardā zarā haTā

phir apnī beTiyoñ ko jalāne lage haiñ log

had ho chukī hai ab to mire inkisār kī

kamtar samajh ke mujh ko satāne lage haiñ log

ilzām saarā apne muqaddar pe Daal kar

nākāmiyoñ ko apnī chhupāne lage haiñ log

sachchā.ī kā alam mire hāthoñ meñ dekh kar

bastī meñ kitnā shor machāne lage haiñ log

maujoñ se laḌte laḌte jo sāhil tak aa gayā

ehsān us pe apnā jatāne lage haiñ log

ghurbat ka ab mazaq uDane lage hain log

daulat ko sar ka taj batane lage hain log

tahzib-e-shahr kitni badal di hai waqt ne

apni riwayaton ko bhulane lage hain log

allah un ki aql ka parda zara haTa

phir apni beTiyon ko jalane lage hain log

had ho chuki hai ab to mere inkisar ki

kamtar samajh ke mujh ko satane lage hain log

ilzam sara apne muqaddar pe Dal kar

nakaamiyon ko apni chhupane lage hain log

sachchai ka alam mere hathon mein dekh kar

basti mein kitna shor machane lage hain log

maujon se laDte laDte jo sahil tak aa gaya

ehsan us pe apna jatane lage hain log