ghurub-e-mehr ka matam hai gulistanon mein

ġhurūb-e-mehr kā mātam hai gulistānoñ meñ

nasīm-e-sub.h bhī shāmil hai nauha-ḳhvānoñ meñ

jahāñ the raqs-e-tarab meñ kabhī dar-o-dīvār

balā.eñ naach rahī haiñ ab un makānoñ meñ

añdherī raat bhayānak khañDar muhīb fazā

bhaTak rahā huuñ ajal ke siyāh-ḳhānoñ meñ

ye aamad āmad-e-tūfān-e-shab ḳhudā kī panāh

tuyūr-e-shām simaT jaa.eñ āshiyānoñ meñ

ye saa.eñ saa.eñ kī āvāz hai ki maut kī huuk

jo gūñjtī hai shayātīn ke tarānoñ meñ

nadīm-e-shab koī afsāna-e-fusūn-o-tilism

ki zindagī kī jhalak hai inhīñ fasānoñ meñ

nahīñ hai shahr-e-vafā kī tabāhiyoñ kā gilā

magar vo log jo rahte the in makānoñ meñ

ajiib thiiñ ye ġharīboñ kī bastiyāñ lekin

ġharīb rah na sake in ġharīb-ḳhānoñ meñ

hamārī gard-e-safar bhī na ab mile shāyad

'ra.īs' ahl-e-tamannā ke kārvānoñ meñ

ghurub-e-mehr ka matam hai gulistanon mein

nasim-e-subh bhi shamil hai nauha-KHwanon mein

jahan the raqs-e-tarab mein kabhi dar-o-diwar

balaen nach rahi hain ab un makanon mein

andheri raat bhayanak khanDar muhib faza

bhaTak raha hun ajal ke siyah-KHanon mein

ye aamad aamad-e-tufan-e-shab KHuda ki panah

tuyur-e-sham simaT jaen aashiyanon mein

ye saen saen ki aawaz hai ki maut ki huk

jo gunjti hai shayatin ke taranon mein

nadim-e-shab koi afsana-e-fusun-o-tilism

ki zindagi ki jhalak hai inhin fasanon mein

nahin hai shahr-e-wafa ki tabahiyon ka gila

magar wo log jo rahte the in makanon mein

ajib thin ye gharibon ki bastiyan lekin

gharib rah na sake in gharib-KHanon mein

hamari gard-e-safar bhi na ab mile shayad

'rais' ahl-e-tamanna ke karwanon mein