ghurub hote hue do sitare aankhon mein

ġhurūb hote hue do sitāre āñkhoñ meñ

shikast-e-ḳhvāb ke haiñ isti.āre āñkhoñ meñ

phir us ke ba.ad kisī bhī palak amaañ na milī

vo roz-o-shab ki jo ham ne guzāre āñkhoñ meñ

ham āḳhir-e-shab-e-ummīd so bhī jaa.eñ magar

vo ḳhvāb-e-gum-shudgāñ kaun utāre āñkhoñ meñ

is ehtimām se rote haiñ tere dil-zadagāñ

ki bāhar āñkhoñ se dariyā kināre āñkhoñ meñ

ham apne chehre pe apnā hī dukh nahīñ rakhte

sab ahl-e-hijr ke haiñ goshvāre āñkhoñ meñ

vo kushtagān-e-pas-o-pesh an-kahe alfāz

jo bach ga.e the so vo bhī sidhāre āñkhoñ meñ

ghurub hote hue do sitare aankhon mein

shikast-e-KHwab ke hain istiare aankhon mein

phir us ke baad kisi bhi palak aman na mili

wo roz-o-shab ki jo hum ne guzare aankhon mein

hum aaKHir-e-shab-e-ummid so bhi jaen magar

wo KHwab-e-gum-shudgan kaun utare aankhon mein

is ehtimam se rote hain tere dil-zadagan

ki bahar aankhon se dariya kinare aankhon mein

hum apne chehre pe apna hi dukh nahin rakhte

sab ahl-e-hijr ke hain goshware aankhon mein

wo kushtagan-e-pas-o-pesh an-kahe alfaz

jo bach gae the so wo bhi sidhaare aankhon mein