ghurur-e-ulfat ki tarz-e-nazish ajab karishme dikha rahi hai

ġhurūr-e-ulfat kī tarz-e-nāzish ajab karishme dikhā rahī hai

hamārī rūThī huī nazar ko tirī tajallī manā rahī hai

vo tuur vaalī tirī tajallī ġhazab kī garmī dikhā rahī hai

vahāñ to patthar jalā diye the yahāñ kaleja jalā rahī hai

mire nasheman meñ shān-e-qudrat ke saare asbāb haiñ muhayyā

havā safā.ī pe hai muqarrar charāġh bijlī jalā rahī hai

na us ke dāman se maiñ hī uljhā na mere dāman se ye hī aTkī

havā se merā bigāḌ kyā hai jo sham-e-turbat bujhā rahī hai

farishte aa.e agar lahad meñ to saaf kah dūñgā rāsta lo

jab us kī chāhat meñ jaan de dī to baat kahne ko kyā rahī hai

jamāl-e-qudrat mujhī ko de de ki maiñ kaleje kī choT sekūñ

kalīm ke ghar meñ rakkhe rakkhe vo aag ab kyā banā rahī hai

ghurur-e-ulfat ki tarz-e-nazish ajab karishme dikha rahi hai

hamari ruThi hui nazar ko teri tajalli mana rahi hai

wo tur wali teri tajalli ghazab ki garmi dikha rahi hai

wahan to patthar jala diye the yahan kaleja jala rahi hai

mere nasheman mein shan-e-qudrat ke sare asbab hain muhayya

hawa safai pe hai muqarrar charagh bijli jala rahi hai

na us ke daman se main hi uljha na mere daman se ye hi aTki

hawa se mera bigaD kya hai jo sham-e-turbat bujha rahi hai

farishte aae agar lahad mein to saf kah dunga rasta lo

jab us ki chahat mein jaan de di to baat kahne ko kya rahi hai

jamal-e-qudrat mujhi ko de de ki main kaleje ki choT sekun

kalim ke ghar mein rakkhe rakkhe wo aag ab kya bana rahi hai