gunge bahre hain ye farman kahan sunte hain

gūñge bahre haiñ ye farmān kahāñ sunte haiñ

ai ḳhudā sun le ki insān kahāñ sunte haiñ

is zamāne meñ mohabbat kī zabāñ vāloñ ko

āñkheñ suntī haiñ bhalā kaan kahāñ sunte haiñ

laakh chīḳhā maiñ ki kachchā hai mirā ghar lekin

mauj meñ aa.e hoñ tūfān kahāñ sunte haiñ

tujh ko apnā hī samajh ke to sadā.eñ dī thiiñ

mujh ko ma.alūm thā anjān kahāñ sunte haiñ

un ke had darja taġhāful kā ye aalam tauba

ham pukāreñ bhī unheñ jaan kahāñ sunte haiñ

roz muflis kī sadā.eñ to udhar jaatī haiñ

ahd-e-hāzir ke ye sultān kahāñ sunte haiñ

ye koī gaañv nahīñ hai ki ḳhabar phailegī

shahr ke log haiñ elaan kahāñ sunte haiñ

gunge bahre hain ye farman kahan sunte hain

ai KHuda sun le ki insan kahan sunte hain

is zamane mein mohabbat ki zaban walon ko

aankhen sunti hain bhala kan kahan sunte hain

lakh chiKHa main ki kachcha hai mera ghar lekin

mauj mein aae hon tufan kahan sunte hain

tujh ko apna hi samajh ke to sadaen di thin

mujh ko malum tha anjaan kahan sunte hain

un ke had darja taghaful ka ye aalam tauba

hum pukaren bhi unhen jaan kahan sunte hain

roz muflis ki sadaen to udhar jati hain

ahd-e-hazir ke ye sultan kahan sunte hain

ye koi ganw nahin hai ki KHabar phailegi

shahr ke log hain elan kahan sunte hain