gunge labon pe harf-e-tamanna kiya mujhe

gūñge laboñ pe harf-e-tamannā kiyā mujhe

kis kor-chashm-shab meñ sitārā kiyā mujhe

zaḳhm-e-hunar ko samjhe hue hai gul-e-hunar

kis shahr-e-nā-sipās meñ paidā kiyā mujhe

jab harf-nā-shanās yahāñ lafz-fahm haiñ

kyuuñ zauq-e-sher de ke tamāshā kiyā mujhe

ḳhushbū hai chāñdnī hai lab-e-jū hai aur maiñ

kis be-panāh raat meñ tanhā kiyā mujhe

dī tishnagī ḳhudā ne to chashme bhī de diye

siine meñ dasht āñkhoñ meñ dariyā kiyā mujhe

maiñ yuuñ sambhal ga.ī ki tirī bevafā.ī ne

be-e'tibāriyoñ se shanāsā kiyā mujhe

vo apnī ek zaat meñ kul kā.enāt thā

duniyā ke har fareb se milvā diyā mujhe

auroñ ke saath merā ta.āruf bhī jab huā

hāthoñ meñ haath le ke vo sochā kiyā mujhe

biite dinoñ kā aks na ā.inda kā ḳhayāl

bas ḳhālī ḳhālī āñkhoñ se dekhā kiyā mujhe

gunge labon pe harf-e-tamanna kiya mujhe

kis kor-chashm-shab mein sitara kiya mujhe

zaKHm-e-hunar ko samjhe hue hai gul-e-hunar

kis shahr-e-na-sipas mein paida kiya mujhe

jab harf-na-shanas yahan lafz-fahm hain

kyun zauq-e-sher de ke tamasha kiya mujhe

KHushbu hai chandni hai lab-e-ju hai aur main

kis be-panah raat mein tanha kiya mujhe

di tishnagi KHuda ne to chashme bhi de diye

sine mein dasht aankhon mein dariya kiya mujhe

main yun sambhal gai ki teri bewafai ne

be-e'tibariyon se shanasa kiya mujhe

wo apni ek zat mein kul kaenat tha

duniya ke har fareb se milwa diya mujhe

auron ke sath mera taaruf bhi jab hua

hathon mein hath le ke wo socha kiya mujhe

bite dinon ka aks na aainda ka KHayal

bas KHali KHali aankhon se dekha kiya mujhe