gunjta shahron mein tanhai ka sannaTa to hai

gūñjtā shahroñ meñ tanhā.ī kā sannāTā to hai

be-kasī kā ham-navā ab tak vahī saayā to hai

TūTtī jaatī haiñ ummīdoñ kī zanjīreñ magar

Thokareñ khāne ko majbūrī kā ik sahrā to hai

chāñd kyā niklegā ḳhvāboñ kī añdherī raat hai

duur tak taarā ḳhayāloñ kā magar chamkā to hai

būḌhe sarkash zar-garī meñ rahzanoñ ke saath haiñ

inqalāb-e-nau kā vo pindār ab TuuTā to hai

in ḳhatīboñ kā tilism-e-lan-tarānī toḌ de

is hujūm-e-be-navāyāñ meñ koī aisā to hai

qissa-e-ādam kī talḳhī zindagī ke saath hai

jannateñ lākhoñ banā kar aadmī tanhā to hai

shor hai Dūbīñ hazāroñ azmateñ tārīḳh kī

kitnī ḳhāmoshī se bahtā vaqt kā dhārā to hai

muskurā kar zer-e-lab shāyad yahī kahte haiñ vo

laakh saudā.ī sahī 'bāqar' magar apnā to hai

gunjta shahron mein tanhai ka sannaTa to hai

be-kasi ka ham-nawa ab tak wahi saya to hai

TuTti jati hain ummidon ki zanjiren magar

Thokaren khane ko majburi ka ek sahra to hai

chand kya niklega KHwabon ki andheri raat hai

dur tak tara KHayalon ka magar chamka to hai

buDhe sarkash zar-gari mein rahzanon ke sath hain

inqalab-e-nau ka wo pindar ab TuTa to hai

in KHatibon ka tilism-e-lan-tarani toD de

is hujum-e-be-nawayan mein koi aisa to hai

qissa-e-adam ki talKHi zindagi ke sath hai

jannaten lakhon bana kar aadmi tanha to hai

shor hai Dubin hazaron azmaten tariKH ki

kitni KHamoshi se bahta waqt ka dhaara to hai

muskura kar zer-e-lab shayad yahi kahte hain wo

lakh saudai sahi 'baqar' magar apna to hai