guzar gae jo wahi the hisab mein mere din

guzar ga.e jo vahī the hisāb meñ mire din

dil-e-shikasta tire pech-o-tāb meñ mire din

maiñ vaise ḳhud bhī zamāne ko thā bhulā.e hue

to kyoñ lage the mire ehtisāb meñ mire din

dabīz dhund meñ ik ranj-e-mustaqil thā mujhe

jo bah rahe the kisī aur baab meñ mire din

galī udaas thī aur do qadam thā mai-ḳhāna

bhaTak rahe the magar iztirāb meñ mire din

unheñ ḳhayāl kī rā'nā.iyoñ meñ honā thā

paḌe hue the kisī pech-o-tāb meñ mire din

mujhe vadī’at-e-be-intihā thī bahte hue

us ik nigah se baham the sharāb meñ mire din

khulī jo aañkh to kuchh aur hī haqīqat thī

ki ḳhvāb se nazar aa.e the ḳhvāb meñ mire din

guzar gae jo wahi the hisab mein mere din

dil-e-shikasta tere pech-o-tab mein mere din

main waise KHud bhi zamane ko tha bhulae hue

to kyon lage the mere ehtisab mein mere din

dabiz dhund mein ek ranj-e-mustaqil tha mujhe

jo bah rahe the kisi aur bab mein mere din

gali udas thi aur do qadam tha mai-KHana

bhaTak rahe the magar iztirab mein mere din

unhen KHayal ki ra'naiyon mein hona tha

paDe hue the kisi pech-o-tab mein mere din

mujhe wadi’at-e-be-intiha thi bahte hue

us ek nigah se baham the sharab mein mere din

khuli jo aankh to kuchh aur hi haqiqat thi

ki KHwab se nazar aae the KHwab mein mere din