guzar jaan se aur Dar kuchh nahin

guzar jaan se aur Dar kuchh nahīñ

rah-e-ishq meñ phir ḳhatar kuchh nahīñ

hai ab kaam dil jis pe mauqūf to

vo naala ki jis meñ asar kuchh nahīñ

huā maa.il us sarv kā dil mirā

ba-juz jaur jis se samar kuchh nahīñ

na kar apne mahvoñ kā hargiz surāġh

ga.e guzre bas ab ḳhabar kuchh nahīñ

tirī ho chukī ḳhushk mizhgāñ kī sab

lahū ab jigar meñ magar kuchh nahīñ

hayā se nahīñ pusht-e-pā par vo chashm

mirā haal madd-e-nazar kuchh nahīñ

karūñ kyūñke inkār ishq aah meñ

ye ronā bhalā kyā hai gar kuchh nahīñ

kamar us kī rashk rag-e-jāñ hai 'mīr'

ġharaz is se bārīk-tar kuchh nahīñ

guzar jaan se aur Dar kuchh nahin

rah-e-ishq mein phir KHatar kuchh nahin

hai ab kaam dil jis pe mauquf to

wo nala ki jis mein asar kuchh nahin

hua mail us sarw ka dil mera

ba-juz jaur jis se samar kuchh nahin

na kar apne mahwon ka hargiz suragh

gae guzre bas ab KHabar kuchh nahin

teri ho chuki KHushk mizhgan ki sab

lahu ab jigar mein magar kuchh nahin

haya se nahin pusht-e-pa par wo chashm

mera haal madd-e-nazar kuchh nahin

karun kyunke inkar ishq aah mein

ye rona bhala kya hai gar kuchh nahin

kamar us ki rashk rag-e-jaan hai 'mir'

gharaz is se barik-tar kuchh nahin