guzishta shab jo itni raushni thi

guzishta shab jo itnī raushnī thī

tumhārī yaad kī jalvagarī thī

fazā meñ gungunāhaT thī ajab sī

havā pattoñ se bāteñ kar rahī thī

ġhazal jaisā sarāpā thā kisī kā

koī sūrat mukammal shā.irī thī

tire alfāz nishtar ban ga.e the

mohabbat intihā par aa ga.ī thī

sunā hai ba.ad mere kuchh dinoñ tak

vo miTTī par lakīreñ khīñchtī thī

vo gaahe ab palaT kar dekhtī hai

koī ik baat kahnā rah ga.ī thī

vahī ham haiñ vahī tīra-shabī hai

mohabbat chaar din kī chāñdnī thī

laboñ par qahqahe hī qahqahe the

koī laḌkī thī yā vo phuljaḌī thī

koī dil meñ achānak aa basā thā

mohabbat kī nahīñ thī ho ga.ī thī

guzishta shab jo itni raushni thi

tumhaari yaad ki jalwagari thi

faza mein gungunahaT thi ajab si

hawa patton se baaten kar rahi thi

ghazal jaisa sarapa tha kisi ka

koi surat mukammal shairi thi

tere alfaz nishtar ban gae the

mohabbat intiha par aa gai thi

suna hai baad mere kuchh dinon tak

wo miTTi par lakiren khinchti thi

wo gahe ab palaT kar dekhti hai

koi ek baat kahna rah gai thi

wahi hum hain wahi tira-shabi hai

mohabbat chaar din ki chandni thi

labon par qahqahe hi qahqahe the

koi laDki thi ya wo phuljaDi thi

koi dil mein achanak aa basa tha

mohabbat ki nahin thi ho gai thi