guzra apna pas-e-murdan hi sahi

guzrā apnā pas-e-murdan hī sahī

kūcha-e-yār meñ madfan hī sahī

ḳhair jo rañg nahīñ hai to na ho

teġh khīñcho mirī gardan hī sahī

qabr-e-bulbul pe chalūñ rone ko

aaj gulzār meñ shevan hī sahī

but to vallāh banā leñge kabhī

shor-e-nāqūs barahman hī sahī

josh-e-vahshat hai dilā najd ko chal

sair karne ke liye ban hī sahī

sham' to yaar chaḌhātā hī nahīñ

dāġh-e-dil qabr meñ raushan hī sahī

haal kuchh mere garebāñ meñ nahīñ

ai junūñ dasht kā dāman hī sahī

koī ham-chashm to ho zindāñ meñ

hairatī dīda-e-rauzan hī sahī

missī mālīda dahan meñ hai kalām

bosa-hā-e-ġhuncha-e-sausan hī sahī

nāsehā us kī burā.ī to na kar

na sahī dost vo dushman hī sahī

gul-ruḳhoñ se to huī qat.a umiid

'mehr' nazzāra-e-gulshan hī sahī

guzra apna pas-e-murdan hi sahi

kucha-e-yar mein madfan hi sahi

KHair jo rang nahin hai to na ho

tegh khincho meri gardan hi sahi

qabr-e-bulbul pe chalun rone ko

aaj gulzar mein shewan hi sahi

but to wallah bana lenge kabhi

shor-e-naqus barahman hi sahi

josh-e-wahshat hai dila najd ko chal

sair karne ke liye ban hi sahi

sham' to yar chaDhata hi nahin

dagh-e-dil qabr mein raushan hi sahi

haal kuchh mere gareban mein nahin

ai junun dasht ka daman hi sahi

koi ham-chashm to ho zindan mein

hairati dida-e-rauzan hi sahi

missi malida dahan mein hai kalam

bosa-ha-e-ghuncha-e-sausan hi sahi

naseha us ki burai to na kar

na sahi dost wo dushman hi sahi

gul-ruKHon se to hui qata umid

'mehr' nazzara-e-gulshan hi sahi