guzra jidhar se rah ko rangin kar gaya

guzrā jidhar se raah ko rangīn kar gayā

jugnū ik āftāb kī tauhīn kar gayā

kis ne biThāyā mujh ko sar-e-masnad-e-sināñ

ye kaun mere jism kī taz.īn kar gayā

ashkoñ ne zaḳhm zaḳhm ko andar se dho diyā

ye ġham tirā to ruuh kī taskīn kar gayā

ye kis kī ḳhāmushī se hai nabz-e-jahāñ rukī

ye kaun kā.enāt ko ġhamgīn kar gayā

aayā thā le ke ziist meñ daulat sukūn kī

jaate hue qarār mirā chhīn kar gayā

ye gaam gaam aa.ine kis ne bichhā diye

ye kaun gaam gaam ko ḳhud-bīn kar gayā

tohmat mire vajūd ko chhū kar palaT ga.ī

samjhā thā vo ki zaat kī taskīn kar gayā

ai kushtgān-e-ishq bharam hai ye ishq kā

rakhnā ye jeb chaak vo talqīn kar gayā

'tāhir' har ek baat meñ jis kī miThās thī

bichhḌā to zindagī ko vo ġhamgīn kar gayā

guzra jidhar se rah ko rangin kar gaya

jugnu ek aaftab ki tauhin kar gaya

kis ne biThaya mujh ko sar-e-masnad-e-sinan

ye kaun mere jism ki tazin kar gaya

ashkon ne zaKHm zaKHm ko andar se dho diya

ye gham tera to ruh ki taskin kar gaya

ye kis ki KHamushi se hai nabz-e-jahan ruki

ye kaun kaenat ko ghamgin kar gaya

aaya tha le ke zist mein daulat sukun ki

jate hue qarar mera chhin kar gaya

ye gam gam aaine kis ne bichha diye

ye kaun gam gam ko KHud-bin kar gaya

tohmat mere wajud ko chhu kar palaT gai

samjha tha wo ki zat ki taskin kar gaya

ai kushtgan-e-ishq bharam hai ye ishq ka

rakhna ye jeb chaak wo talqin kar gaya

'tahir' har ek baat mein jis ki miThas thi

bichhDa to zindagi ko wo ghamgin kar gaya