گزرے دنوں کا ذکر ہوا اور ویرانی کی بات چلی

گزرے دنوں کا ذکر ہوا اور ویرانی کی بات چلی

اک مدت سے خشک تھیں آنکھیں پھر پانی کی بات چلی

اس کی گلی سے شعلہ اٹھا میرے گھر میں آگ لگی

جلنے کا تو ذکر نہیں تھا تابانی کی بات چلی

مشکل منظر دیکھتے رہنا اس کی پرانی عادت تھی

مشکل سے اس چشم کے آگے آسانی کی بات چلی

بادل آئے ہوا چلی اور باہر موسم بدل گیا

دل کے بہتے دریا میں بھی طغیانی کی بات چلی

مایوسی کے پتھر سے اک آس کا چشمہ پھوٹ بہا

آس کے بہتے پانی میں پھر حیرانی کی بات چلی

روشن ہو گئیں ساری گلیاں سب دروازے چمک اٹھے

جب سے عامرؔ شہر میں اس کی مہمانی کی بات چلی