guzre hain tere sath jo din-raat abhi tak

guzre haiñ tere saath jo din-rāt abhī tak

āñkhoñ meñ base haiñ vahī lamhāt abhī tak

kuchh ishq kī lazzat bhī hai kuchh sozish-e-dil bhī

taaza haiñ mire dil meñ ye sauġhāt abhī tak

kartī huuñ kabhī jab tirī tasvīr se bāteñ

kyuuñ aañkh se hotī hai ye barsāt abhī tak

vo terā tabassum vo mohabbat bharī nazreñ

raqsāñ hai lahū meñ tirī har baat abhī tak

rahne nahīñ detā mujhe tanhā vo tasavvur

zinda hai mire dil meñ tirī zaat abhī tak

tū naqsh hai dil par mire tasvīr kī sūrat

badle hī nahīñ haiñ mire hālāt abhī tak

guzre hain tere sath jo din-raat abhi tak

aankhon mein base hain wahi lamhat abhi tak

kuchh ishq ki lazzat bhi hai kuchh sozish-e-dil bhi

taza hain mere dil mein ye saughat abhi tak

karti hun kabhi jab teri taswir se baaten

kyun aankh se hoti hai ye barsat abhi tak

wo tera tabassum wo mohabbat bhari nazren

raqsan hai lahu mein teri har baat abhi tak

rahne nahin deta mujhe tanha wo tasawwur

zinda hai mere dil mein teri zat abhi tak

tu naqsh hai dil par mere taswir ki surat

badle hi nahin hain mere haalat abhi tak