guzre hue lamhon mein basar hone laga hun

guzre hue lamhoñ meñ basar hone lagā huuñ

maazī kī tarah sarf-e-nazar hone lagā huuñ

larzāñ hai ka.ī din se mire zabt kā mīzān

kuchh din se yūñhī zer-o-zabar hone lagā huuñ

kyā jaane kyā bikhrā hai mire jism ke andar

mahsūs ye hotā hai khañDar hone lagā huuñ

detā huuñ bhaTakte hue ḳhvāboñ ko panāheñ

āvāra ḳhayālāt kā ghar hone lagā huuñ

manzil mirī aqdām mire raah mirī hai

hone bhī do gumrāh agar hone lagā huuñ

kuchh daad to de rāh-numā azm-e-safar kī

manzil ke liye gard-e-safar hone lagā huuñ

āñkhoñ se chhalak jaatā hai ehsās-e-nadāmat

aksar yūñhī bā-dīda-e-tar hone lagā huuñ

kyoñ daf.atan aane lage har samt se patthar

lagtā hai ki phaldār shajar hone lagā huuñ

hotā hai asar ruuh pe ranj aur ḳhushī kā

'sālim' maiñ farishte se bashar hone lagā huuñ

guzre hue lamhon mein basar hone laga hun

mazi ki tarah sarf-e-nazar hone laga hun

larzan hai kai din se mere zabt ka mizan

kuchh din se yunhi zer-o-zabar hone laga hun

kya jaane kya bikhra hai mere jism ke andar

mahsus ye hota hai khanDar hone laga hun

deta hun bhaTakte hue KHwabon ko panahen

aawara KHayalat ka ghar hone laga hun

manzil meri aqdam mere rah meri hai

hone bhi do gumrah agar hone laga hun

kuchh dad to de rah-numa azm-e-safar ki

manzil ke liye gard-e-safar hone laga hun

aankhon se chhalak jata hai ehsas-e-nadamat

aksar yunhi ba-dida-e-tar hone laga hun

kyon dafatan aane lage har samt se patthar

lagta hai ki phaldar shajar hone laga hun

hota hai asar ruh pe ranj aur KHushi ka

'salim' main farishte se bashar hone laga hun