guzre hue waqton ka nishan tha to kahan tha

guzre hue vaqtoñ kā nishāñ thā to kahāñ thā

ham se jo nihāñ hai vo ayaañ thā to kahāñ thā

is tarah lipaTtī hai udāsī ki ye socheñ

do pal kī ḳhushī kā jo gumāñ thā to kahāñ thā

bastī kā taqāza hai kahīñ haiñ to kahāñ haiñ

majnūñ kā bayābāñ meñ makāñ thā to kahāñ thā

baiThā hai mire paas ki chalnā nahīñ mumkin

sohbat kī hadoñ kā jo nishāñ thā to kahāñ thā

ab sochte haiñ baiTh ke gulshan kī fazā meñ

sahrā meñ hamārā jo makāñ thā to kahāñ thā

piirī hai buzurgī hai buḌhāpā hai ki kyā hai

is karb meñ rahnā ki javāñ thā to kahāñ thā

nashsha hī nahīñ sab kā bharam TuuT rahā thā

sunte the koī pīr-e-muġhāñ thā to kahāñ thā

'āmir' ko hamīñ DhūñD ke laa.eñ haiñ ba-mushkil

kahte haiñ vo pahle se yahāñ thā to kahāñ thā

guzre hue waqton ka nishan tha to kahan tha

hum se jo nihan hai wo ayan tha to kahan tha

is tarah lipaTti hai udasi ki ye sochen

do pal ki KHushi ka jo guman tha to kahan tha

basti ka taqaza hai kahin hain to kahan hain

majnun ka bayaban mein makan tha to kahan tha

baiTha hai mere pas ki chalna nahin mumkin

sohbat ki hadon ka jo nishan tha to kahan tha

ab sochte hain baiTh ke gulshan ki faza mein

sahra mein hamara jo makan tha to kahan tha

piri hai buzurgi hai buDhapa hai ki kya hai

is karb mein rahna ki jawan tha to kahan tha

nashsha hi nahin sab ka bharam TuT raha tha

sunte the koi pir-e-mughan tha to kahan tha

'amir' ko hamin DhunD ke laen hain ba-mushkil

kahte hain wo pahle se yahan tha to kahan tha