guzre lamhat ka ehsas hua jata hai

guzre lamhāt kā ehsās huā jaatā hai

dāman-e-vaqt yūñhī mujh se chhaTā jaatā hai

maiñ ujāle ko mohabbat kā ḳhudā likhtā huuñ

vo añdhere hī se mānūs huā jaatā hai

jis kī ḳhushbū se fazāoñ meñ mahak thī shab-bhar

sub.h-dam us kī taraf saañp baḌhā jaatā hai

mujh ko Dar hai koī aabid na bahak jaa.e kahīñ

dil-rubā chāñd kā andāz huā jaatā hai

duur rah kar bhī rag-e-jāñ se lipaT jaate haiñ

aur is dil meñ ujālā sā huā jaatā hai

is qadar zahr pilāyā mujhe us ne 'ālam'

talḳhī-e-zīst kā ehsās miTā jaatā hai

guzre lamhat ka ehsas hua jata hai

daman-e-waqt yunhi mujh se chhaTa jata hai

main ujale ko mohabbat ka KHuda likhta hun

wo andhere hi se manus hua jata hai

jis ki KHushbu se fazaon mein mahak thi shab-bhar

subh-dam us ki taraf sanp baDha jata hai

mujh ko Dar hai koi aabid na bahak jae kahin

dil-ruba chand ka andaz hua jata hai

dur rah kar bhi rag-e-jaan se lipaT jate hain

aur is dil mein ujala sa hua jata hai

is qadar zahr pilaya mujhe us ne 'alam'

talKHi-e-zist ka ehsas miTa jata hai