guzre tamam umr ajab imtihan se hum

guzre tamām umr ajab imtihāñ se ham

uljhe kabhī zamīñ se kabhī āsmāñ se ham

is aa.ine ko mausam-e-gul kī talāsh hai

ahd-e-shabāb DhūñD ke laa.eñ kahāñ se ham

jaise vo āsmān hī muTThī meñ aa gayā

the itnā ḳhush-gumān kisī bad-gumāñ se ham

āvārgī-e-shauq meñ sūd-o-ziyāñ hai kyā

ye kārobār siikh rahe haiñ dhuāñ se ham

tanqīd kar rahe haiñ usī kī zabān par

alfāz le ke aa.e haiñ jis dāstāñ se ham

jo nigah-e-intiḳhāb ke qābil na thā kabhī

āñkheñ laḌāne baiTh ga.e us jahāñ se ham

iqrār ko banā ga.e inkār vo 'fahīm'

kahte the jo palaTte nahīñ haiñ bayāñ se ham

guzre tamam umr ajab imtihan se hum

uljhe kabhi zamin se kabhi aasman se hum

is aaine ko mausam-e-gul ki talash hai

ahd-e-shabab DhunD ke laen kahan se hum

jaise wo aasman hi muTThi mein aa gaya

the itna KHush-guman kisi bad-guman se hum

aawargi-e-shauq mein sud-o-ziyan hai kya

ye karobar sikh rahe hain dhuan se hum

tanqid kar rahe hain usi ki zaban par

alfaz le ke aae hain jis dastan se hum

jo nigah-e-intiKHab ke qabil na tha kabhi

aankhen laDane baiTh gae us jahan se hum

iqrar ko bana gae inkar wo 'fahim'

kahte the jo palaTte nahin hain bayan se hum