guzre wade ko wo KHud yaad dila dete hain

guzre va.ade ko vo ḳhud yaad dilā dete haiñ

dil kī soī huī hasrat ko jagā dete haiñ

nau-giraftār-e-qafas haiñ nahīñ karte fariyād

jaan ko terī ye sayyād duā dete haiñ

tālib-e-jalva-e-dīdar samajh kar mujh ko

ik jhalak sī ruḳh-e-raushan kī dikhā dete haiñ

zab.h karte haiñ taḌapne nahīñ dete mujh ko

tah-e-zānū mirī gardan ko dabā dete haiñ

apne mauqe pe har ik baat bhalī hotī hai

shab-e-furqat meñ ye sadme bhī mazā dete haiñ

ġhair ke kahne se dar-gor kahā karte haiñ

jīte-jī vo mujhe paiġhām-e-qazā dete haiñ

maiñ vo qaidī huuñ ki sone nahīñ dete mujh ko

aañkh lagtī hai to zanjīr hilā dete haiñ

le liyā bosa-e-ruḳhsār to kyā jurm kiyā

pyaar kī baat pe nāhaq vo sazā dete haiñ

sham-e-mahfil huuñ na āshiq na maiñ bū-e-gul huuñ

mah-jabīñ kyuuñ mujhe āñchal kī havā dete haiñ

un ke qabze meñ hai kaunain kī shāhī 'āshiq'

shaah vo de nahīñ sakte jo gadā dete haiñ

guzre wade ko wo KHud yaad dila dete hain

dil ki soi hui hasrat ko jaga dete hain

nau-giraftar-e-qafas hain nahin karte fariyaad

jaan ko teri ye sayyaad dua dete hain

talib-e-jalwa-e-didar samajh kar mujh ko

ek jhalak si ruKH-e-raushan ki dikha dete hain

zabh karte hain taDapne nahin dete mujh ko

tah-e-zanu meri gardan ko daba dete hain

apne mauqe pe har ek baat bhali hoti hai

shab-e-furqat mein ye sadme bhi maza dete hain

ghair ke kahne se dar-gor kaha karte hain

jite-ji wo mujhe paigham-e-qaza dete hain

main wo qaidi hun ki sone nahin dete mujh ko

aankh lagti hai to zanjir hila dete hain

le liya bosa-e-ruKHsar to kya jurm kiya

pyar ki baat pe nahaq wo saza dete hain

sham-e-mahfil hun na aashiq na main bu-e-gul hun

mah-jabin kyun mujhe aanchal ki hawa dete hain

un ke qabze mein hai kaunain ki shahi 'ashiq'

shah wo de nahin sakte jo gada dete hain