guzregi kya jamal-e-ruKH-e-yar dekh kar

guzregī kyā jamāl-e-ruḳh-e-yār dekh kar

hairat hai husn hasrat-e-dīdār dekh kar

nā-sāzī-e-jahāñ kī to parvā kabhī na thī

jī bujh gayā hai tum ko dil-āzār dekh kar

is dil-figār-e-shauq kī hasrat na pochhiye

majrūh ho gayā ho jo talvār dekh kar

āñkheñ huī thiiñ chaar ki pahlū meñ kuchh na thā

dil kho gayā nigāh-e-ḳharīdār dekh kar

koī khulā huā hai to koī chhupā huā

vaa.iz na chheḌ mujh ko gunāhgār dekh kar

betāb kar diyā nigah-e-iltifāt ne

aañsū nikal paḌe unheñ ġham-ḳhvār dekh kar

'kaukab' dayār-e-ishq kuchh aisā udaas hai

rotī hai bekasī dar-o-dīvār dekh kar

guzregi kya jamal-e-ruKH-e-yar dekh kar

hairat hai husn hasrat-e-didar dekh kar

na-sazi-e-jahan ki to parwa kabhi na thi

ji bujh gaya hai tum ko dil-azar dekh kar

is dil-figar-e-shauq ki hasrat na pochhiye

majruh ho gaya ho jo talwar dekh kar

aankhen hui thin chaar ki pahlu mein kuchh na tha

dil kho gaya nigah-e-KHaridar dekh kar

koi khula hua hai to koi chhupa hua

waiz na chheD mujh ko gunahgar dekh kar

betab kar diya nigah-e-iltifat ne

aansu nikal paDe unhen gham-KHwar dekh kar

'kaukab' dayar-e-ishq kuchh aisa udas hai

roti hai bekasi dar-o-diwar dekh kar