guzri hui raunaq ke nishan le ke chale hum

guzrī huī raunaq ke nishāñ le ke chale ham

lo kushta-charāġhoñ kā dhuāñ le ke chale ham

hai dosh pe kitne hī zamānoñ kī virāsat

har-gām pe ik bār-e-garāñ le ke chale ham

ho terā burā ārzū-e-sañg-e-havādis

so kārgah-e-shīshagarāñ le ke chale ham

is anjuman naaz meñ hai kaun ḳharīdār

be-kār matā-e-dil-o-jāñ le ke chale ham

mai-ḳhāne meñ ummīd-e-karam laa.ī thī 'maikash'

aur be-ruḳhī-e-pīre-muġhāñ le ke chale ham

guzri hui raunaq ke nishan le ke chale hum

lo kushta-charaghon ka dhuan le ke chale hum

hai dosh pe kitne hi zamanon ki wirasat

har-gam pe ek bar-e-garan le ke chale hum

ho tera bura aarzu-e-sang-e-hawadis

so kargah-e-shishagaran le ke chale hum

is anjuman naz mein hai kaun KHaridar

be-kar mata-e-dil-o-jaan le ke chale hum

mai-KHane mein ummid-e-karam lai thi 'maikash'

aur be-ruKHi-e-pire-mughan le ke chale hum