حادثے غم کے شب و روز گزرتے ہی رہے

حادثے غم کے شب و روز گزرتے ہی رہے

ہم جو کرنا تھا بہر طور وہ کرتے ہی رہے

ان سے دنیا کو نمائش کے سوا کچھ نہ ملا

آئنہ سامنے رکھ کر جو سنورتے ہی رہے

حق پرستی کے اصولوں کا ہوا ہم سے فروغ

لوگ آغاز میں انجام سے ڈرتے ہی رہے

کسی قابل تو نہ تھا گلشن ہستی اپنا

قافلے پھر بھی بہاروں کے ٹھہرتے ہی رہے

زینت منصب عالی ہوئے دنیا کے حریص

اور حق دار بلندی سے اترتے ہی رہے

اپنی آنکھوں میں محبت کے سمٹ کر جلوے

کچھ اس انداز سے نکھرے کہ نکھرتے ہی رہے

عمر بھر ذوق فن شعر رہا ہم کو خلیقؔ

رنگ جذبات کا اشعار میں بھرتے ہی رہے