hadse gham ke shab-o-roz guzarte hi rahe

hādse ġham ke shab-o-roz guzarte hī rahe

ham jo karnā thā bahar-taur vo karte hī rahe

un se duniyā ko numā.ish ke sivā kuchh na milā

aa.ina sāmne rakh kar jo sañvarte hī rahe

haq-parastī ke usūloñ kā huā ham se faroġh

log āġhāz meñ anjām se Darte hī rahe

kisī qābil to na thā gulshan-e-hastī apnā

qāfile phir bhī bahāroñ ke Thaharte hī rahe

zīnat-e-mansab-e-ālī hue duniyā ke harīs

aur haqdār bulandī se utarte hī rahe

apnī āñkhoñ meñ mohabbat ke simaT kar jalve

kuchh is andāz se nikhre ki nikharte hī rahe

umr bhar zauq-e-fan-e-sher rahā ham ko 'ḳhalīq'

rang jazbāt kā ash.ār meñ bharte hī rahe

hadse gham ke shab-o-roz guzarte hi rahe

hum jo karna tha bahar-taur wo karte hi rahe

un se duniya ko numaish ke siwa kuchh na mila

aaina samne rakh kar jo sanwarte hi rahe

haq-parasti ke usulon ka hua hum se farogh

log aaghaz mein anjam se Darte hi rahe

kisi qabil to na tha gulshan-e-hasti apna

qafile phir bhi bahaaron ke Thaharte hi rahe

zinat-e-mansab-e-ali hue duniya ke haris

aur haqdar bulandi se utarte hi rahe

apni aankhon mein mohabbat ke simaT kar jalwe

kuchh is andaz se nikhre ki nikharte hi rahe

umr bhar zauq-e-fan-e-sher raha hum ko 'KHaliq'

rang jazbaat ka ashaar mein bharte hi rahe