hadse gasht mein rahte hain qaza ki surat

hādse gasht meñ rahte haiñ qazā kī sūrat

kitnī mahdūd hai duniyā meñ baqā kī sūrat

qissa-e-sabr-o-razā us ko sunāo jā kar

jis ne dekhī na ho arbāb-e-vafā kī sūrat

zaḳhm bhar jā.eñge pal bhar meñ yaqīñ hai mujh ko

vo jo aa jaa.eñ zarā der davā kī sūrat

aa ke baiThe bhī nahīñ Thiik se aur chal bhī diye

jab bhī aate ho to aa.e ho havā kī sūrat

tū jo bole to utar jaa.e mujassam dil meñ

kisī tāsīr se bharpūr duā kī sūrat

lazzat-e-dīd se mahrūm huuñ mahrūm sahī

vo ḳhayāloñ meñ hai maujūd ḳhudā kī sūrat

hādisa phir to nahīñ koī falak-sāz huā

utrī utrī sī hai kyoñ aaj ziyā kī sūrat

hadse gasht mein rahte hain qaza ki surat

kitni mahdud hai duniya mein baqa ki surat

qissa-e-sabr-o-raza us ko sunao ja kar

jis ne dekhi na ho arbab-e-wafa ki surat

zaKHm bhar jaenge pal bhar mein yaqin hai mujh ko

wo jo aa jaen zara der dawa ki surat

aa ke baiThe bhi nahin Thik se aur chal bhi diye

jab bhi aate ho to aae ho hawa ki surat

tu jo bole to utar jae mujassam dil mein

kisi tasir se bharpur dua ki surat

lazzat-e-did se mahrum hun mahrum sahi

wo KHayalon mein hai maujud KHuda ki surat

hadisa phir to nahin koi falak-saz hua

utri utri si hai kyon aaj ziya ki surat