hadse hone lagen to hum dua ko DhunDte hain

hādse hone lageñ to ham du'ā ko DhūñDte haiñ

maslakoñ kī qaid meñ rah kar ḳhudā ko DhūñDhte haiñ

nochte haiñ ham badan se ḳhud qabā-e-zindagānī

aur phir ham gum-shuda apnī ridā ko DhūñDte haiñ

ham fazā meñ gholte haiñ zahr ḳhud sochoñ kā apnī

saañs lene ke liye phir ḳhud havā ko DhūñDte haiñ

maslahat kī bādbānī kashtiyoñ meñ baiTh kar ham

'ishq ke gahre samundar meñ vafā ko DhūñDte haiñ

vaqt kī bhīgī havā meñ sāhiloñ kī ret par ab

umr-e-rafta ke bikharte naqsh-e-pā ko DhūñDte haiñ

kāsa-e-dil kī khanaktī ḳhvāhishoñ ke shor-o-ġhul meñ

āsmānoñ se utartī ik sadā ko DhūñDhte haiñ

gard-e-māzī se lipaTte an-ginat chehroñ ke pīchhe

aaj bhī ham tere chehre kī ziyā ko DhūñDte haiñ

hadse hone lagen to hum du'a ko DhunDte hain

maslakon ki qaid mein rah kar KHuda ko DhunDhte hain

nochte hain hum badan se KHud qaba-e-zindagani

aur phir hum gum-shuda apni rida ko DhunDte hain

hum faza mein gholte hain zahr KHud sochon ka apni

sans lene ke liye phir KHud hawa ko DhunDte hain

maslahat ki baadbani kashtiyon mein baiTh kar hum

'ishq ke gahre samundar mein wafa ko DhunDte hain

waqt ki bhigi hawa mein sahilon ki ret par ab

umr-e-rafta ke bikharte naqsh-e-pa ko DhunDte hain

kasa-e-dil ki khanakti KHwahishon ke shor-o-ghul mein

aasmanon se utarti ek sada ko DhunDhte hain

gard-e-mazi se lipaTte an-ginat chehron ke pichhe

aaj bhi hum tere chehre ki ziya ko DhunDte hain