hadse jo shahr mein hote rahe hain

hādse jo shahr meñ hote rahe haiñ

sab hamāre naam se joḌe ga.e haiñ

somnāt-e-dil ko ḳhud Dhāyā hai maiñ ne

mere andar kitne but TuuTe hue haiñ

tai kiyā hai ham ne dasht-e-nā-shanāsī

ham bhare bāzār meñ tanhā hue haiñ

is bulandī kā bharosa kuchh nahīñ hai

ret ke Tīloñ pe ham baiThe hue haiñ

rābta rūhoñ meñ kaise rah sakegā

jism ke rishte jahāñ TuuTe hue haiñ

sone vaalo ab to kholo apnī āñkheñ

jāgte lamhe sadā.eñ de rahe haiñ

‘asr-e-hāzir meñ huī haiñ dūriyāñ kam

fāsle lekin diloñ ke baḌh ga.e haiñ

karb se taḳhlīq ke guzre haiñ kab vo

tabsira jo mere fan par kar rahe haiñ

hadse jo shahr mein hote rahe hain

sab hamare nam se joDe gae hain

somnat-e-dil ko KHud Dhaya hai main ne

mere andar kitne but TuTe hue hain

tai kiya hai hum ne dasht-e-na-shanasi

hum bhare bazar mein tanha hue hain

is bulandi ka bharosa kuchh nahin hai

ret ke Tilon pe hum baiThe hue hain

rabta ruhon mein kaise rah sakega

jism ke rishte jahan TuTe hue hain

sone walo ab to kholo apni aankhen

jagte lamhe sadaen de rahe hain

‘asr-e-hazir mein hui hain duriyan kam

fasle lekin dilon ke baDh gae hain

karb se taKHliq ke guzre hain kab wo

tabsira jo mere fan par kar rahe hain