hadse phail gae saya-e-mizhgan ki tarah

hādse phail ga.e sāya-e-mizhgāñ kī tarah

ġham-e-daurāñ bhī milā hai ġham-e-jānāñ kī tarah

laakh paivand umīdoñ ne lagā rakkhe haiñ

dil kī sūrat nazar aatī hai garebāñ kī tarah

koī aflāk-nashīñ hai to pukāre mujh ko

hasrateñ ḳhāk-basar haiñ mirī tūfāñ kī tarah

aur hoñge vo mayassar hai jinheñ lutf-e-bahār

ham to gulshan meñ bhī rahte haiñ bayābāñ kī tarah

jo bhī gul hai yahāñ firdaus banā baiThā hai

kaun khiltā hai yahāñ ġhuncha-e-isyāñ kī tarah

ye bhī e.ajāz kahīñ bād-e-muḳhālif kā na ho

dil uḌā jaatā hai aurañg-e-sulaimāñ kī tarah

ḳhauf-e-mahshar se na ghabrāo tum ai bāda-kasho

dar-e-tauba bhī khulā hai dar-e-zindāñ kī tarah

ham kiyā karte haiñ ashkoñ se tavāzo.a kyā kyā

jab ḳhayāloñ meñ vo aa jaate haiñ mehmāñ kī tarah

na koī saaz na sañgīt na pāzeb na giit

uf ye māhaul ki hai shahr-e-ḳhamoshāñ kī tarah

ham tire misr meñ aa.e haiñ zuleḳhā-e-shikam

bik na jaa.eñ kahīñ ham yūsuf-e-kan.āñ kī tarah

hadse phail gae saya-e-mizhgan ki tarah

gham-e-dauran bhi mila hai gham-e-jaanan ki tarah

lakh paiwand umidon ne laga rakkhe hain

dil ki surat nazar aati hai gareban ki tarah

koi aflak-nashin hai to pukare mujh ko

hasraten KHak-basar hain meri tufan ki tarah

aur honge wo mayassar hai jinhen lutf-e-bahaar

hum to gulshan mein bhi rahte hain bayaban ki tarah

jo bhi gul hai yahan firdaus bana baiTha hai

kaun khilta hai yahan ghuncha-e-isyan ki tarah

ye bhi eajaz kahin baad-e-muKHalif ka na ho

dil uDa jata hai aurang-e-sulaiman ki tarah

KHauf-e-mahshar se na ghabrao tum ai baada-kasho

dar-e-tauba bhi khula hai dar-e-zindan ki tarah

hum kiya karte hain ashkon se tawazoa kya kya

jab KHayalon mein wo aa jate hain mehman ki tarah

na koi saz na sangit na pazeb na git

uf ye mahaul ki hai shahr-e-KHamoshan ki tarah

hum tere misr mein aae hain zuleKHa-e-shikam

bik na jaen kahin hum yusuf-e-kanan ki tarah